Pavarësisht situatës së tensionuar politike në Kuvend mes mazhorancës dhe opozitës, që në nisje të legjislaturës së re, forcat politike do të duhen të ulen sërish për të përfunduar procesin e plotësimit me anëtarë të komisioneve të përhershme parlamentare.

Kryeparlamentari Niko Peleshi ka thirrur të hënën Konferencën ë Kryetarëve për të marrë propozimet e tyre për anëtarët dhe zëvendësuesit e tyre në komisionet e përhershme parlamentare.

Seanca e javës së shkuar, e cila u konsiderua antikushtetuese nga opozita, pasuar me kërkesën për ripërsëritje sikundër me nisjen e procedurave për shkarkimin e kryetarit të Kuvendit duket se do të ndikojë edhe te vendimmarrja e opozitës për të mos u bërë pjesë e mbledhjes.

Gazment Bardhi, si pjesë e grupit, nuk mund të jetë pranishëm pas penalizimit për të mos qenë pjesë e punimeve të Kuvendit për disa ditë.

Në këto kushte i takon nënkryetarit demokrat të Kuvendit, Agron Gjekmarkaj, që të depozitojë në Konferencën e Kryetarëve propozimet e demokratëve për të plotësuar vakancat në komisionet e përhershme.

Edhe pse ende nuk ka një vendim të formës së prerë nga PD-ja, burimet i thanë RTSH-së se Partia Demokratike mund të mos i dërgojë propozimet e saj në konferencën e së hënës. Edhe pse opozitarët nuk kanë vendim për të bojkotuar parlamentin, marrëdhënia e tyre e kushtëzuar me këtë institucion është vendosur, sipas tyre, që me ndryshimet e njëanshme të Rregullores, që i hapën rrugë shtimit të komisioneve të përhershme, për të vijuar me seancën e votëbesimit të qeverisë, që PD-ja e konsideroi dhunë ndaj Kushtetutës dhe opozitës.

/rtsh.al/